NATIONAL NEWS—Pormal nga linmingkod kumo Presidente han 78th World Health Assembly (WHA) hi Department of Health Sec. Ted Herbosa kumo tinaglawas han Pilipinas ha Palais des Nations sa Geneva, Switzerland.
Ine an syahan nga higayon nga mangunguna an Pilipinas ha WHA, an pinakahitaas nga decision-making body ha World Health Organization ngan ginkakalakipan hin 194 nga mga nasud.
Ha pag-convene han assembly, ginpasalamatan ni Sec. Herbosa an mga miyembro han WHO Western Pacific Region para ha nominasyon han Pilipinas ngan ha tanan nga WHO Member States para ha ira suporta ngan madig-on nga sumpayan.
Sugadman, ginpasalamatan ni Sec. Ted an mga nanguna ha nasabi nga Assembly.
Subay ha DOH, ha pagtikang han WHA, magkalain-lain nga himangrawon panlawas an ginpaghisgutan kadungan han pagbug-os han mga polisiya para padig-unon pa an sumpayan han mga nasud ha bug-os nga nasud ngan makab-ot an “HealthForAll”.b
