TACLOBAN CITY – Usa ha gintatagan hin pagtagad ha pagkayana han Department of Health (DOH) Regional Office 8 an pagdumara hin mga interbensyon nga makakabulig ha mga katawhan nga apektado an mental health condition mahitungod han COVID-19 pandemic.
Una hini, iginkakaalarma han mga otoridad ha pagkayana an nagtitikahitaas nga kaso han suicide incidents ha rehiyon tikang han pagbutho han pandemya kun diin kasagaran nga hinungdan han mga ini tungod ha depression o grabe nga problema nga ginpapag-agian.
Sumala kan Archie Lastimado, Health Education and Promotion Officer han DOH Rehab and Treatment Center ha Dulag Leyte, mahitungod hini in naglunsar han yana nga tuig an DOH hin mental health line nga pwede nga matawagan han mga tawo nga nanginginahanglan hin bulig.
An mao nga mental health line in ginlunsar pinaagi han Mental Health Act nga gin-aprubahan han nakalabay nga tuig kun diin pwede nga makatawag an hin-o man nga nag-aagi hin problema ngan depresyon ha Smart hotline hini nga 09474238423 ngan ha GLobe naman in 09665316464.
Samtang, nagpahinumdom gihapon an mao nga opisyal nga bisan hin-o in pwede nga makaghatag hin bulig ha tawo nga nag-aagi hin mabug-at nga problema pinaagi han pagpaabat ha mga ini nga mayda andam nga mamati, bumulig ngan magsirbe nga support system para ha ira.
