TACLOBAN CITY – Ginpahayag han Department of Health (DOH) Regional Office 8 nga igpapadayon la gihapon nira an ira ant-measles immunization ha mga kabataan ngan kalagsan samtang dire pa naubos an epidemic threshold o padayon nga nahihipatik nga kaso hin tipdas.
Sumala kan Elena Villarosa, han immunization program han DOH 8, ha pagkayana in maabot na ha 200,000 nga mga kabataan an ira nabakunahan kontra tipdas ngan 500,000 naman an ihap han kabug-usan upod na an mga kalagsan.
Dugang pa hini nga dire hira maundang samtang dire pa nabubulkas an outbreak status ha rehiyon ngan samtang dire pa naubos an epidemic threshold.
Ini in mahitungod nga subay ha ira surveillance report, mayda la gihapon mga talagudti nga mga kaso ha magkadirudilain nga lugar ha rehiyon nga nahihipatik.
Panawagan naman hini ha mga kag-anak nga dire mahadlok nga igpailarom ha immunization an ira mga anak mahitungod nga ini in talwas ngan naiha na nga ginpapatuman nga programa han gobyerno.
