CABULIHAN, ORMOC CITY – Usa nga disgrasya ha kadalanan an nahipatik kanina han pasado ala-1 han maagahon ha Brgy. Cabulihan, Ormoc City, kun diin duha an nahipatik nga patay.
Ginkilala an mga biktima kanda alyas Kim, babaye, drayber han motor, 19-anyos, residente han Brgy. Bayog ngan hi alyas Steve, lalaki, back-rider han motor, 21-anyos, ngan residente han Brgy. San Jose, Ormoc City.
Sumala kan Ormoc City Police Office Traffic Enforcement Unit Chief, PCpt. Jason Mateo, makusog han impact han pagbugguay han duha nga sarakyan nga nagin kawsa han kamatayon han duha nga indibidwal.
Basar han imbestigasyon, tipagawas ha Ormoc City nga ruta an six-wheeler nga truck ngan tipasulod naman ha Ormoc City an ruta han motorsiklo nga ginmamanehuan han mga biktima, kun diin pag-abot ha may kurbada nga dapit in lumapos ha linya an motorsiklo nga makusog nga bumunggo ha truck.
Pumailarom ha truck an drayber han motor kaupod an motor hini ngan nahilasik an back-rider, kun diin dayun an mga ini nga gindara ha hopsital mahuman nga marespondehan pero gindeklara ini nga dead-on-arrival han attending physician.
Nagpahimatngon naman ni Mateo ha mga motorista nga maghinay pirmi ha biyahe—magsunod han mga balaod-trapiko, magsul-ot han mga protective gear, ngan magin mabinantayon ha oras han pagpapadalagan han sarakyan.
