TACLOBAN CITY – Gin institutionalized na pinaagi han Executive Order No. 241 dida pa han tuig-2022 an programa nga Direkta Ayuda ha syudad han Borongan.
Ine in ha bulig ngan paniguro han mga opisyales han lokal nga pangobyernuhan han syudad han Borongan nga gin pangunahan ni Borongan City Mayor Jose Ivan Dayan Agda.
Sumala pa hine, gintalinguha han gobyerno han syudad nga madugngan an tag-P250 kada bulan nga nakakarawat han mga istudyante, kun diin tinikangan yana nga tuig-2025 in magigin P400 na kada bulan an makakarawat han mga ine.
Samtang, dida han nakalabay nga semana in gintikangan na an release han Direkta Ayuda nga programa ngadto han mga benepistaryo nga istudyante han senior high ngan kolehiyo nga na-iskuylaha sulod ngan gawas han Borongan City.
Maabot naman na hin 6,188 nga mga istudyante an nakatalaan nga kumarawat han nasabi nga ayuda kun diin an kada istudyante in makarawat hin P1,500 para han syahan nga semestre han School Year 2024-2025, subay ha datos han City Social Welfare Development Office han syudad.
Labot la han Direkta Ayuda in mayda gihapon Libreng Sakay ngan Libreng Medisina nga programa an nasabi nga syudad nga natatagamtaman han ngatanan.
