TACLOBAN CITY – Nanawagan an Department of Interior and Local Government (DILG) nga respetuhon ngan sundon han ngatanan an priority list schedule han panbakuna kontra COVID-19.
Ini in kadungan han mga report nga nagawas nga may pira nga mga government officials nga nagpaturok na hin bakuna ha kaluyo nga dire pa hira an ada ha priority list nga matatagan han COVID-19 vaccine.
Sumala kan Miles Colasito, tagapagyakan han DILG 8, ha pagkayana in padayon pa nira nga ginkukuha an impormasyon kun naihatag na an show cause order ha mga alkalde nga nakapagpabakuna.
Kinahanglan naman nga batunon han mao nga mga alkalde an show cause order ngan maghatag hin valid nga eksplinasyon.
Gintagan naman hin duon ni Colasito nga importante an pagsunod ngan pagrespeto ha priority list han vaccination tungod nga may ginpirmahan an Pilipinas kaupod an World Health Organization (WHO) kun diin mayda sistema han panbakuna nga kinahanglan nga sundon.
Sumala kan Colasito kun mismo an Pilipinas in dire magsusunod ha mao nga sistema ngan priority list in bangin manelikado lugod an nasud nga dire na matagan hin suporta ngan bulig labi na tikang ha COVAX facility ngan iba pa nga programa.
