TACLOBAN CITY– Padayon an ginhihimo nga panginano han buhatan hiton Department of Interior an Local Government (DILG), ha mga lugar nga ginkokonsidera nga hot-spot ha pagdudumaraon nga 2025 Midterm Election.
Sumala kan DILG Regional Director Region 8, Arnel Agabe, nakipag-koordinar na hira ha mga tinaglawas hiton Philippine National Police (PNP), partikular na adton naka-assign ha Leyte.
Kasumpay ine han pagkamatay han usa nga kapitan, mahuman nga pamusilon han waray pa kakilal-e nga mga suspetsado.
Ginpaangbit naman hine, nga ha padayon nira nga pakikigsumpayan ngan koordinasyon, nag deploy na gihapon hira hin kadugangan nga mga tinaglawas hiton mga kapulisan ha 3rd ngan 4th district hiton Leyte, nga masukot magkamayda hin mga untoward incident, ilabi yana nga harani na iton piniliay.
Dugang pa ni Agabe, posible pa nga madugangan an ihap han mga naka deploy nga kapulisan dire la ha mao nga distrito, kundi ha bug-os nga Sinirangan Bisayas agud nga masigurado an hapsay ngan mahimyang nga 2025 Midterm Election.
