Ginpapakusog han Department of the Interior and Local Government (DILG) ha Eastern Visayas an pagpatuman han Bagong Pilipinas Barangay Scholarship Program, nga kabahin han mga programa han administrasyon ni Presidente Ferdinand Marcos Jr. para mabuligan an mga estudyante ha mga barangay ha bug-os nga nasud.
Sumala kan Dr. Jhonel M. Añavesa, Chief han Local Government Monitoring and Evaluation Division (LGMED) han DILG Region 8, panuyo han programa nga mapahirani ngadto ha mga estudyante an suporta han gobyerno agud masigurado nga makakarawat hira hin bulig para ha ira pag-eskwela.
Ginpahayag ni Añavesa nga an programa in kabahin han Barangay Makikinabang Program, kun diin an kada barangay makakakarawat hin P200,000 nga pondo para ha mga proyekto ngan programa nga makakabenepisyo ha ira komunidad.
Ha mao nga kantidad, P100,000 an igintalaan para ha mga scholar nga tinatawag nga Finisher Fund. Ini nga pondo in para ha mga graduating nga estudyante ha bug-os nga nasud, agud mabuligan hira ha mga panginahanglanon ha pagtapos han ira pag-aram.
Sumala kan Añavesa, an pagpatuman han programa ginbubuhat pinaagi han Office of the Executive Secretary ngan Liga ng mga Barangay, kaupod an DILG. Tungod hini, mayda papel an DILG ha pagmonitor ha mga lokal nga gobyerno ha sakto nga pagpatuman han programa ha mga barangay.
Dugang pa niya, nagpagawas an DILG hin Memorandum Circular No. 2026-038, nga naglalakip han mga guidelines para ha implementasyon han programa. Iginpagawas an mao nga memorandum ngan guidlines dida han Hulyo 2, 2026, para magin klaro an mga pamaagi ngan kinahanglan sundon ha pagpatuman han Bagong Pilipinas Barangay Scholarship Program ha mga barangay.
