TACLOBAN CITY – Ginhihingita han Rotary Club of Tacloban kaupod an Department of Health Eastern Visayas ngan iba pa nga grupo ngan ahensya sugad han Rotaract Club of Tacloban, Department of Interior and Local Government (DILG) ngan Department of Education Region 8 an pagdudumara hin Deworming para ha mga kabataan.
Sumala kan Rotary Club of Tacloban President Jose Antonio Reyna, kumo usa ha priority project focus han organisasyon in Health, in ira gusto tagan hin importansya an panlawas liwat han mga kabataan in labi na nga damo pa an mga mayda problema partikular na an pagkakaada hin mga wati.
“So usa ito ha amon nakikita nga makakabulig hitun kabataan through hitun deworming.” yakan ni Reyna.
Dida han nakalabay nga mga adlaw, in nagkaada hin pirmahay hin Memorandum of Agreement an ira organisasyon kaupod an iba pa nga mga ahensya han gobyerno agud nga makaghimo hin stratehiya ngan procedures ngan pati gihapon polisiya han ira pagbubuhaton nga proyekto.
Magigin pilot project area naman ini dinhi ha usa nga barangay ha Syudad han Tacloban sunod nga tuig ha Enero kutob Hunyo.
“From there, once naplantsa na namon an implementation, then that’s the time we will spread out to other areas of our region para maimplement, an amon gud talaga intensyon an bug-os nga region 8.” dugang pa ni Reyna.
Aminado naman an Department of Education Region 8 nga mayda hira mga programa nga nakukurian pag implementar mahitungod han pag iiban han mga trabahuon ha ira opisna in labi na adtun mga DOH programs and implementations.
Sumala kan Dr. Ronelo Al K. Firmo, Assistant Regional Director han Department of Education Region 8, an mga nakatuka ha pag iimplementar han mga proyekto in adtun mga nurse nira nga diri liwat sadang.
“So yana itun in-charge han DOH implementation and programs like deworming and immunization, adto nala ha atun mga nurses ha DepEd in which we are currently underman kay pira la it amon nurses dinhi ha Tacloban, we only have five (5) nurses so they are catering to 1,000-3,000 students per nurses.” yakan ni Firmo
Dugang pa niya nga usa daw han mga rason nga habubo an rating han nasud ha Programme for International Student Assessment (PISA) an malnutrisyon nga maidudukot liwat ha deworming.
Naglalaum hi Reyna nga tungod hini nga ira proyekto in madako an mga kabataan hin maupay an ira panlawas.
“Hopefully makabulig ini ha atun mga kabataan nga they will grow healthier, diri mastant itun ira growth, magin maupay hira ha atun sosyodad tungod hit atun maupay nga panlawas.” sumala pa kan Reyna.
