TACLOBAN CITY – Padayon an suporta han Department of Education (DepEd) Tacloban City Division ha mga estudyante, magturutdo ngan kag-anak han San Jose National High School (SJNHS) kasunod han panmusil nga nagresulta han kamatayon han tulo nga estudyante.
Sumala kan Dr. Nilo Eder, Information Officer han DepEd Tacloban City Division, nakatalaan an paglubong kan Chris Lorenz Fabian ha Hunyo 30, samtang ha Hulyo 1 ngan 2 an paglubong kanda Joyancee Separa ngan Ayessa Nicole Dazo. May mga representante liwat han DepEd nga matambong ha tagsa nga mga lubong.
Sumala kan Eder, plano han eskwelahan nga magpatuman anay hin online classes ha SJNHS tikang Hulyo 1 tubtob 3, samtang padayon an paghatag hin psycho-social support.
Ginalaoman naman nga mabalik an face-to-face classes ha Hulyo 6, diri anay gagamiton an classroom kun diin nahitabo an insidente. Pinaagi han bulig han City Government, pipinturahan ngan aayuson an nasabi nga classroom basi diri na ito magpahinumdom han makasurubo nga hitabo lakip an pagpadayon han pagparig-on han pader han eskwelahan.
Dugang pa niya, ginpapakusog liwat an seguridad ha SJNHS pinaagi han pagdugang hin mga security guards nga may shifting. May plano liwat an DepEd nga magbutang hin metal detectors ha pipira nga dagko nga eskwelahan. Bisan limitado pa an 14 nga units nga ginpalit, ginsiring ni Eder nga rekomendasyon han Schools Division Superintendent nga ha kadugayan magkaada hini an ngatanan nga eskwelahan.
May maopay liwat nga balita tikang ha mga ospital. Sumala han latest report han school nurse, tulo na han mga nasamdan an nakagawas na han ospital. An usa nga pasyente ha Leyte Provincial Hospital in ginalaoman nga makakagawas na liwat, samtang an duha nga tikang ha ICU han Eastern Visayas Medical Center in nailipat na ha private room ngan padayon an pagrekober. An usa pa nga pasyente ha ACE Medical Center in stable na an kahimtang ngan nakaiskedyul na para ha operasyon.
Ha kataposan, nanawagan hi Eder ha publiko nga magin responsable ha pagpaangbit ngan paghatag hin impormasyon may kalabotan han insidente. Iya ginhangyo an ngatanan nga respetuhon an mga pamilya han mga biktima nga padayon pa nga nag-aantos han kasubo, ngan likyan an pagpakalat hin diri beripikado nga impormasyon nga mahimo makadugang han ira gin-aabat. Dugang pa niya, padayon an DepEd ha pag-andam han mga magturutdo pinaagi hin debriefing basi mas mahibaro hira kon paonan-o susuportahan an emosyonal nga kahimtang han mga estudyante ha pag-abri utro han klase.
