TACLOBAN CITY – Nagdesisyon an Department of Education (DEPED) Tacloban City Division nga himoon nga uusa nala an night high school ha bug-os nga syudad tungod han pagtikaguti han mga enrollees hini.
Sumala kan Dr. Nilo Eder, tagapagyakan han DEPED Tacloban City Division, ha pagkayana in mayda naeksister nga upat nga mga night high schools ha syudad pero tungod nga habubo na an ihap han mga nagpapaenroll nga estudyante, nagdesisyon an division nga igtarampo nala an mga ini ha uusa la nga eskwelahan.
An dati nga night high school ha Anibong in hihimoon na nga regular day high school samtang an Cirilo Roy Montejo ngan San Jose Night High School naman in opisyal na nga ginsiradhan.
Mahitungod hini an Tacloban City Night High School nala an mabibilin nga night high school ha syudad.
Gintagan naman hin doon han DEPED nga dire pwede nga tanggalon an night high school ha syudad tungod nga an panuyuan hini in agud nga maging accessible ha ngatanan an pag-eskwela labi na ha mga kabataan nga dire makakasulod ha kada aga nga klase.
