NATIONAL NEWS– Nakatalaan nga magtudlok an Department of Education (DepEd) hin 15,000 nga mga school principal agud mapuno an mga bakante nga posisyon ha mga panpubliko nga eskwelahan ha Pilipinas.
Subay han ahensya, matutuman na an ira saad nga magdeploy hin mga kwalipikado nga magturutdo kumo solusyon ha kakulangan han mga principal ha mga eskwelahan.
Manunumduman nga basar ha Year 2 report han Second Congressional Commission on Education II, nahingadayan han DepEd nga 55% han mga panpubliko nga eskwelahan ha Pilipinas in ha pagkayana waray principal.
Subay han EDCOM II, ini in durot han hamubo nga passing rate ha National Qualifying Examination for School Heads (NQESH), kulang hin mga kwalipikado nga kandidato, mabugat na an mga proseso, ngan kawarayan hin maupay nga mentoring, coaching, ngan formal nga mga induction programs para ha mga principal.
Agud masolbar na ini, iginpahayag han DepEd nga mayda na nira pira nga pitad nga titikang yana nga tuig, sugad nala han pagdeploy hin mga kwalipikado nga principal.
