TACLOBAN CITY – Ginpasabot han Commission on Human Rights (CHR) Eastern Visayas ha publiko nga mas mapapadagmit na an pagreport han mga problema kabahin ha pagtalapas ha katungod-pantawo o human rights mahitungod han pag-abri han MISMO o Management Information System Monitoring Outlet.
An MISMO in usa nga webpage portal nga ginhimo para ma-digitalize an proseso han pagpasaka hin kaso o mga pag-aro hin bulig ha CHR.
Sumala kan Commission on Human Rights (CHR) Eastern Visayas Director, Atty. Marierise Joaquin, an MISMO “Arungot mo, Baton ko” in ginlunsad han CHR Central Office dida pa han Mayo han nakalabay nga tuig-2024.
Ha mga maghahatag hin report in kinahanglan la kumadto ha ira web portal nga: mismo.chr.gov.ph o pwede gihapon makipagsumpayan pinaagi han ira mga numero.
Labot la han MISMO, gindumara gihapon an Regional Launching Contact Poster kun diin opisyal na nga iginpakita an “Narito ang CHR” Contact Poster.
Ini nga Contact Poster in nagsusulod hin mga impormasyon sugad hiton hotline, email, ngan address hiton Commission on Human Rights – Eastern Visayas agud nga masayon makita-an ngan ma-access iton mga human rights services.
Samtang, gin-aaghat naman ni Atty. Joaquin an publiko nga igsumat an bisan ano nga makit-an ngan ma-eksperyensyahan nga pagtalapas ha katungod pantawo. (via Bombo Shiela Encio)
