TACLOBAN C ITY- Ginmalatumat hiton Tacloban City Division, nagdumara hira hin psychosocial intervention ha ngatanan nga grade level han San Jose National High School, agud nga maibanan an ira trauma nga na-eksperyensa han nahitabo nga mass shooting ha nasabi nga eskwelahan.
Sumala kan Dr. Nilo Eder, Information Officer han Tacloban City Division, ine nga pitad an ira nakikita agud nga ma-balhin an panhuna-huna han mga estudyante, ngan maka-move on ha nahitabo, kun diin ha-pagkayana, ha singbahan hira nagdudumara han psychosocial intervention.
Aminado naman ine nga mayda mga kag-anak, an nag desisyon nga igbalhin an ira mga anak ha iba nga eskwelahan, para han seguridad han mga ine.
Dugang pa ni Eder, dire nira mababasol an kag-anak, tungod nga nakaka-trauma, ngan nakaka-alarma an nahitabo ha San Jose National High School, para han ngatanan nga estudyante magin ha mga kag-anak .
Ginpaangbit pa ni Eder, nga ha pagkayana nag-aaro hiya hin pag-ampo ha publiko tungod duha yana nga biktima nga naka-confined ha ICU in ada ha kritikal nga sitwasyon, samtang an usa naman in ada na ha stable nga kabutang.
Mababaruan, nga nagbilin hin 3 nga patay ngan sobra 20 nga samaran nga estudyante, an nahitabo ha San Jose NHS mass shooting han nakalabay nga adlaw.
Nagsuhestyon naman ine ha publiko, nga likayan an pagpapasarang hin mga sayop nga impormasyon, ngan magin responsable ha mga gin-popost ha social media, nga posible makaghatag pa hin kadugangan nga trauma ha mga biktima.
