TACLOBAN CITY—Ginpahimatngunan han Department of Health Eastern Visayas, an publiko nga mag-ikmat ha ginkakabarak-an nga mpox.
Sumala kan Dr. Ludina Insigne, Emerging and Re-Emerging Infectious Disease, DOH Vlll, ine in ha kaluyo nga waray pa kompirmasyon han nasabi nga sakit dinhi ha Eastern Visayas.
Dugang pa ni Insigne, nga an nasabi nga pahimatngon in kasunod na gihapon ha ginpahuruhugot nga surveillance matungod ha deklarasyon han World Health Organization ha mpox kumo usa nga Public Health Emergency of International Concern (PHEIC).
Ginmalatumat naman ni Insigne, nga dire mabaraka an publiko, matungod nga nauupay naman an mpox ha sulod han 21 diyas pinaagi naman han pag-pailarom han pag isolate, ngan pag-inom hin mga tambal.
Sanglit nga nanawagan ine ha kadam-an, nga kun mayda na maabat nga sintomas sugad hiton 1-3 days nga hiranat, rashes ha nawong, ngan kaluya han lawas dayon nga magpa konsulta ha doktor agud nga matagan hin dayon nga medikasyon.
Naghatag naman ine hin suhestyon ha publiko, nga magin vigilante, ngan batasanon nga magin malimpyo ha lawas, sugad han paghuhugas hiton kamot, ngan pagsusul-ot hiton face mask kun mapakadto ha mga matatawo nga lugar.
