TACLOBAN CITY – Maabot na ha 291 an ihap han dengue cases ha bug-os nga syudad han Tacloban tikang han Enero tubtob ha presente nga bulan yana nga tuig 2020.
Sumala kan Dra. Gloria Fabrigas, head han Tacloban City Health Office, kaupod na han mao nga ihap an mga suspected cases pero an ihap han kumpirmado ngan probable cases han dengue in maabot naman ha 230.
An mao gihapon nga ihap in 42.19% nga mas habubo kumpara han ihap han dengue cases han naglabay nga tuig.
Dugang pa hini nga tikang gihapon han Enero in upat na an nahipatik nga naawatan hin kinabuhi tungod han mao nga sakit.
Nagkaada na hin clustering of cases pero hapsay an surveillance han City Health Office tungod nga ira ginkakadto mismo an mga barangay para magdumara hin larvae survey, misting o di man ngani fogging kun ginkikinahanglan.
