TACLOBAN CITY – Ginpahayag han Department of Health (DOH) Regional Office 8 nga naghibubo hin 73 percent an nahipatik nga kaso hin dengue ha Sinirangan Bisayas yana nga tuig 2020 kun ikukumpara han pareho nga period han nakalabay nga tuig.
Sumala kan DOH Eastern Visayas assistant regional director Exuperia Sabalberino, ha pagkayana in mayda na 4,317 nga dengue cases ha rehiyon kon diin siyam hini an namatay.
Mas hibubo ini kon igkukumpara ha 16,238 nga mga kaso kon diin 54 an naitala nga namatay han pareho nga period han 2019.
An siyam nga namatay in tikang ha Abuyog, La Paz, syudad han Tacloban, Ormoc ngan Baybay ha Leyte; Giporlos, Arteche, ngan Gen. MacArthur ha Eastern Samar; ngan ha Tagapul-an ha Samar.
Hini nga ihap, 2,194 iton dengue cases ha Leyte, 592 ha Southern Leyte, 536 ha Samar, 416 ha Biliran, 298 ha Eastern Samar ngan 281 ha Northern Samar.
Ginduon ni Sabalberino nga bisan kon naghibubo an ihap han nagkasakit han dengue, kinahanglan la gihapon nga magin mabinantayon han publiko ngan igpractice an 4S strategy– search and destroy ha mga mosquito breeding places, seek early consultation, self-protection method, ngan suportahan an fogging/spraying ha mga hotspot areas, kon diin an paghitaas hin nga kaso in nag abot na hin duha nga magsunod nga semana.
Gin-aaghat gihapon han mao nga opisyal an mga local government units nga regular nga mag organiza hin clean-up drive para madestroso an mga boronayan hin lamok.
