NATIONAL – Ginrekomenda han Department of Agriculture kan Presidente Ferdinand Marcos Jr., nga magpatuman hin temporary import ban ha bugas nga titikangan ha Setyembre.
Ginmalatumat ni DA Spokesperson ngan Assitant Secretary Arnel de Mesa nga igbubutang nira an import ban ha harvest season ha Agosto ngan Setyembre.
Dugang pa han DA official, ginrekomenda nira nga maiha hin 45 ka-adlaw kutob 60 ka-adlaw an pagsuspinde ha pag-aangkat han bugas.
Ha sugad nga pamaagi, magigin competitive na an farmgate price han mga parag-uma.
Ha pagbana-bana han DA, maabot ha 11M metriko tonelada han humay an posible nga ig-harvest tikang ha butnga han Agosto kutob han siyahan nga semana han Oktubre.
Ini an rason kun kay-ano kinahanglan ig-undang an pagsulod han imported nga bugas mahitungod ha damo nga suplay han bugas ha nasud ha pagkayana.
