NATIONAL NEWS– Ginmanduhan na ni Department of Agriculture (DA) Secretary Francisco Tiu Laurel Jr. an National Food Authority (NFA) nga tikangan na an pagbalhin hiton mga buffer stocks ha Visayas kumo pag-aandam hiton launching han P20/kilo nga bugas nga programa ha ilarom han departamento.
Subay ha kalihim, magdudugay ine hin pira kasemana an nasabi nga pagbalhin hin mga stocks hiton bugas tikang ha NFA warehouses partikular na an tikang ha Mindoro pakadto ha magkalain-lain nga parti han Visayas.
Ugsa hine, ginsigurado na han buhatan an clearance ha pagbabaligya han mga bugas tikang ha Commission on Elections (Comelec) nga kaparti han campaign promise ni Pangulong Ferdinand Marcos Jr. hadton matudlok ine kumo Presidente han Pilipinas han tuig 2022.
Mababaruan, suportado naman hiton mga lokal nga pangobyernuhan ha Visayas an inisyatiba han DA ngan andam ine nga makiparti ha mao nga programa.
