Ginpatuman han Civil Service Commission an mga ahensya han gobyerno nga ipatuman an upat ka-adlaw nga compressed work week, basta masusunod an pira nga kondisyon agud dire madelatar an paghahatag hin serbisyo publiko.
Sumala kan Civil Service Commission Region 8 Regional Director, Atty. Marilyn Taldo, nga panuyuan hini in agud mabalanse an work-life balance han mga empleyado ngan suportaran ngan maatimanan han mga ini an ira health ngan mental health ngan sugadman an ira seguridad depende ha ira trabaho ngan lugar nga ira gintratrabahuan.
Panuyuan gihapon hini in agud ma-ibanan an trapiko ngan makatipid ha enerhiya labi na ha mga major urban centers.
Dugang pa ni Atty. Taldo, nga ha ilarum han bag-o nga aludayday, kinahanglan makumpleto an 40 work hours ha sakob han upat ka-adlaw.
May kagawasan naman iton kada ahensya nga magtala kun gaano kahilaba an oras han trabaho kada adlaw ngan kun kinahanglan hin kadugangan nga day-off iton ira empleyado, basta makukumpleto han mga ini an 40 ka-oras kada semana ngan magpapabilin nga abri gihapon an mga ahensya ngan serbisyo publiko tikang Lunes kutob Biyernes.
Ginklaro naman han opisyal nga kun nahituman ha holiday o suspensyon an trabaho ha ilarum han compressed work schedule, ginkokonsidera nga naituman na hini an bug-os nga 10-hours work ngan dire na ini puydi bawi-on, labot la ha mga empleyado nga kaupod ha 24/7 essential frontliners.
Samtang, ini naman nga ginpagawas nga CSC Resolution No. 2600838 in nag-aameyenda ha 2022 guidelines nga may paghisumpay naman ha flexible work arrangement ha mga buhatan han gobyerno.
