NATIONAL – Gin kumpirma ni Philippine National Police (PNP) Chief PGen. Nicolas Torre III nga presente nga ada ha ilarom han ira protective custody an whistleblower ha kaso han mga nawawara nga sabungros nga hi alyas “Totoy”.
Ha usa nga presscon nga ginbuhat ha Kampo Krame, gintagan hin pagklaro ni Torre nga maiha na nga naghahatag hin pahayag hi Totoy ha ira buhatan, pira kabulan na an nakalalabay ugsa pa bumuto an mga bag-o hine nga pahayag kasumpay ha kinamumutangan han mga lawas han mga sabungeros ngan magin an ngaran han mga dabi ha nasabi nga kaso.
Dugang pa ni Torre, dire la anay nira igpagawas agud masigurado nga dire mauunahan ngan mabubuhuan an ira mga gindudumara nga imbestigasyon kasumpay ha kaso ngan agud makakuha hin sakto nga ebidensya nga makakabulig agud mapadagmit an pagresolba han mga kaso han mga sabungeros.
Pag-eksplikar ni Torre, dire magawas an mga bag-o nga impormasyon ngan magin an pira nga ebidensya kun waray hira magdumara hin ‘under the radar’ nga imbestigasyon nga nagin dalan para makuha nira an mga impormasyon nga presente nira nga kapot.
Ha presente, an ngatanan han impormasyon nga ira nakuha in naipasa na ha buhatan han Department of Justice (DOJ) para ha nana ha mga preliminary investigation ha kaso ngan berepikasyon han mga pahayag ni Totoy.
