TACLOBAN CITY – Gin anunsyo han DOH regional office nga maabot na 81 porsyento han mga COVID 19 patient ha rehiyon an nakarekober na
Ha usa na virtual press briefing kakulop , ginpahayag ni Dr. Minerva Molon nga ha 611 nga mga indibidwal nga mga nagpositibo han mao nga virus, 486 na han mga ini an naupay ngan 111 nala an active cases.
Nakontrol na liwat han community transmission ha bungto han Tarangnan, Samar ngan ha Hilongos, La Paz ngan Burauen, Leyte kon diin waray na nira aktibo nga mga kaso.
Sumala pa kan Molon nga ini in mahitungod han mas sayo nga pag isolate ngan pagquarantine han mga pasyente ngan mga returning residents ngan pagbubligay han tanan nga mga ahensiya han gobyerno.
Ha 104 liwat nga mga health workers nga natapnan han mao nga virus, 98 o kon 94.23 ha ira an nakarekober.
Kaupod ha mga nakarekober an 14 nga mga empleyado han DOH, ngan an mga health workers han EVRMC kon diin usa na an nagpapabilin ha isolation facility.
Kadam-an daw hini nga health workers in nakabalik na liwat ha ira mga trabaho.
Ginklaro naman han mao nga ahensiya nga poydi madeklara nga COVID-19-free an area/munisipyo kun ha sulod hin 28 diyas (or 2 incubation period) waray na nahipatik nga kaso hin covid19 ha mao lugar.
