TACLOBAN CITY – Naghaon hi Samar 1st District Rep. Edgar Mary Sarmiento hin balaudnon nga nagpapanuyo nga balyuan an ngaran han tulay ha Calbayog City ha Samar kun diin namatay ha nahitabo nga shooting incident hi anay Mayor Ronaldo Aquino.
Subay ha House Bill No. 9141 ni Cong. Sarmiento, ginhahangyo hini nga balyuan an ngaran han Laboyao Bridge ha Brgy. Lonoy, Calbayog City kumo Mayor Ronaldo P. Aquino Bridge.
Sumala kan Sarmiento, an mao nga tulay in masisirbe nga pahinumdom nga dire maundang an mga taga-Calbayog samtang dire pa natatagan hin hustisya an kamatayon han ira anay alkalde.
Dugang pa han mao nga kongresista nga an Mayor Ronaldo P. Aquino bridge, in magsisirbe gihapon nga simbolo ngan hinumduman ha naging kinabuhi han anay mayor ngan an tim-os nga pagserbisyo hini ha bug-os nga Calbayog City.
Nahibaruan nga han nakalabay nga Marso 24 in gindul-ong ha lubnganan hi anay Mayor Aquino kun diin ginbabana-bana nga maaabot ha 4,000 nga mga residente an nakidul-ong.
Ginlubong an anay mayor ha usa nga private cemetery ha Calbayog kun diin nakalubong an iya mga kag-anak.
Ha pagkayana in padayon an imbestigasyon han Philippine National Police (PNP) ngan National Bureau of Investigation (NBI) bahin han insidente ngan naglalaum an pamilya Aquino nga maipapagawas na an resulta hini ha mas dagmit nga panahon.
