TACLOBAN CITY – Nakatalaan nga pagtukuron ha syudad han Tacloban an usa nga cold storage facility nga makakabulig agud malikayan an pagkadunot han mga agri-products.
Sumala kan City Agriculture Head, Romelo Anade, waray cold storage facility ha syudad kun diin nahimumutang an dako nga merkado kun diin an syahan nga panuyo hine nga pasilidad in mapahalawig an kinabuhi han mga produkto han mga parag-baligya.
Dugang pa hine, an mga agri-fisheries products kaupod na an mga wet products in maiko-konsidera nga mga ‘perishable’ o madagmit nga maguba nga mga produkto.
Kun diin, usa ine ha mga problema han mga suppliers ngan mga parag-baligya ha merkado mahitungod nga kaurugan in napipiritan an mga ine mga mag-ubos hin presyo o ig labog nala an mga waray kapalit nga produkto.
An nasabi nga pasilidad in mayda naman pondo nga P120 million kun diin bulig ine ha 2025 budget han Department of Agriculture Region 8 ngan ine gihapon an magigin pinakasyahan nga klase ha bug-os nga Visayas region.
