TACLOBAN CITY – Nagpagawas hin programa an City Nutrition Office han syudad han Tacloban nga magduduso ha mga kag-anak nga tutduan hin healthty lifestyle an mga kabataan.
An nasabi nga programa in gintatawag nga “Nutrition Programs for Tacloban Children”, kun diin panuyo hine nga tutduan an mga kabataan nga kumaon ha sakto nga oras, pumuli hin barato pero puno hin nutrisyon nga mga pagkaon agud dire madali-dali nga maduktan hin mga sakit.
An mga aktibidad ha nasabi nga programa in an pagkakamay-ada hin miniature gardens para ha mga barangay; pag-aaghat ha mga nagpapasuso nga nanay ngan mga nagbuburod nga mag-breastfeed ha ira mga anak; ngan seminars para ha pag-ugop ha kalugaringon maypaghisumpay ha mental health.
Sumala kan Tacloban City Nutrition Office Head, Malu Tabao, gin aaghat han ira opisina an mga barangay officials ngan kada pamilya nga magkamay-ada hin ira mga kalugaringon nga miniature garden, sugad man hin mga communal gardens o backyard gardens ha ira tagsa-tagsa nga mga barangay o panimalay mahitungod nga dako an maibubulig hini.
Dugang pa hine, ini nga mga pitad in madagmit nga makabulig ha pag-supply ha lawas hin angay nga mga utanon nga kinahanglanon hiton lawas.
Kasumpay hine, ginduduso gihapon han opisina han City Nutrition ha mga burod ngan lactating women nga magpa-check up ngan magpasuso ha ira mga anak ha syahan nga 1,000 days han bata ha kalibutan, kun ini in bago pala nga igin aanak.
Gin aaghat naman ni Tabao an mga mulupyo nga kumaon hin mga nutritious nga mga pagkaon sugad han utan ngan mga prutas, kun diin ginkikinahanglan an partisipasyon ngan kooperasyon han mga kag-anak ha pagpapakita ngan pagsusunod ha ira mga anak nga kumaon gihapon hin mga masustansya nga mga pagkaon. (via Bombo Niña Magpili)
