TACLOBAN CITY – Ginsisiguro han Tacloban City COMELEC nga dire hira manginginlabot ha pagtanggal han mga campaign posters ha mga private properties bisan pa ano nga size ngan content hini.
Ini in kumo pagsunod temporary restraining order han Supreme Court nga dire iglakip ha Oplan Baklas operation han COMELEC an mga campaign materials nga nahimumutang ha mga pribado nga lugar.
Sumala kan Atty. Ramon Dadulla, Jr., Tacloban City Election Officer, ha pagkayana in padayon naman an monitoring han ira task force para han oplan baklas operation labi na nga nagtikang na an campaign period para han mga kandidato ha lokal nga posisyon.
Dire naman kalakip ha ira operasyon an mga campaign posters ha mga private properties lugod in matutok hira ha pantanggal o panbaklas han mga campaign materials ha syudad nga natalapas ha gintutugot nga sukol, content ngan lugar nga pagbubutangan hini.
