TACLOBAN CITY– Padayon an gindudumara nga monitoring han Tacloban City Agriculture ha mga danyos nga ginbayaan ni bagyong Kristine dinhe ha syudad hiton Tacloban.
Sumala kan Head City Agriculture, Romelo Anade, subay ha ira kapot nga datos, an Tacloban City in mayda 272 ka-ektarya hiton humayan, ngan ha mao nga ihap ada ha 29-ektarya an naguba dinhe ngan ginbabana-bana, nga maabot ha P2.8M an ginbayaan nga danyos ha sektor hiton humay.
Ginmalatumat ni Anade, nga an mga naguba nga humay in dire pa ada ha harvesting season, matungod nga ha bulan pa hiton Nobyermbre an mga ine nakatalaan nga harbison.
Samtang, para naman ha mga high value crops, an Tacloban in mayda 85- ka ektarya, ngan ha mao nga ihap 22-ektarya dinhe an naguba, ngan ginbabana-bana naman nga ada ha P230,000 an ginbayaan nga danyos ha sektor hiton pananom.
Dugang pa ni Anade, nakakuha gihapon hira hin datos, ha sektor hin pangisdaan, kun diin maabot ha 132 nga mga parupangisda an apektado han bagyong Kristine, ngan ginbabana-bana naman nga sobra katunga hiton milyon, an ginbayaan nga danyos ha sektor hiton pangisdaan.
Ha pagkayana, nakikipagsumpayan na an ira buhatan ha Department of Agriculture Region 8, agud nga mabuligan an mga ine, ngan sugadman pira nga mga inisyal nga bulig tikang naman ha City government hiton Tacloban.
