TACLOBAN CITY – Ginkumpirma ni Catbalogan City Mayor Dexter Uy nga nagpositibo hiya ha COVID-19.
Ha ginpagawas nga video han iya official page ha facebook, ginpahayag han 26 anyos nga alkalde nga ha pagkayana in nagpapabilin hiya ha isolation facility han ira syudad.
Sumala pa ha iya, nakaabat hiya hin hiranat, sip-on, ubo ngan pagkawara han iya panrasa sanglit gintalinguha hini nga magpaswab test.
Posible nga nakuha daw niya an mao nga virus ha iya paglibot-libot ha ira syudad para pahimatngunan an mga residente nga sumunod ha health protocols.
Umapela naman hi Mayor Uy ha iya mga nasasakupan nga magpabilin ha ira mga panimalay kun waray naman importante nga tuyo ha gawas ngan sugadman padayon nga magsunod ha minimum health standards agud nga makalikay ha COVID-19.
Nahibaruan nga hi Uy an pinakasyahan nga local government official ha rehiyon nga nagpositibo ha COVID-19.
