TACLOBAN CITY – Ginbulkas na an ha ilarom han local red tide warning an kadagatan nga sakop nga Calbayog City, karuyag sidngon, igintutugot na an panguha, pagkaon, ngan pagbaligya han mga pangti-on o shellfish, ngan alamang o hipon tikang ha nasabi nga dagat.
Ha kaluyo hine in nagpapabilin naman nga positibo ha Paralytic Shellfish Poison o toxic red tide an mga kadagatan han Leyte, Leyte, ngan Matarinao Bay.
Sumala kan Bureau of Fisheries and Aquatic Resources (BFAR) Eastern Samar Information Officer, Christine Gresola, ine in mahitungod nga positibo la gihapon ha red tide an mga shellfish meat samples nga nakolekta ha nasabi nga kadagatan.
Kumo paghirot, mahugot nga igindidire an panguha, pagkaon, ngan pangolekta han ngatanan nga klase hin panti-on o shellfish ngan acetes sp. “alamang” o hipon nga tikang ha nasabi nga mga dagat. An hin-o man nga magtatalapas ha nasabi nga shellfish ban in mag-aatubang ha kaangayan nga penalidad.
An isda, nu-os, pasayan, ngan masag nga tikang ha nasabi nga mga kadagatan in pwede naman ig konsumo basta siguraduhon la nga presko an mga ine, tatanggalan hin mga laman-loob sugad han tina-e ngan hasanag, ngan huhugasan hin maupay gamit an running water.
