TACLOBAN CITY – Usa nga pampasaheros nga bus tikang ha Catbalogan City an nadisgrasya ha kadalanan han Sitio Cantaba, Brgy. Caticugan, Sta. Rita, Samar, kakulop nga adlaw han alas-5 han aga.
Sumala kan Sta. Rita Municipal Police Station Chief of Police, PMaj Rex Pabunan, nagbibiyahe unta tikadi ha Tacloban an nasabi nga bus han madisgrasya ine ha may paliko nga parte han karsada.
Subay han impormasyon, malaksi an dalagan han bus rason nga dida han tipaliko na ine in nawarayan ine hin kontrol ngan nagduru-diretso ha kaluyo nga karsada hasta nga nahulog an katunga hine ha may slope nga parte han karsada.
Umuran naman ha nasabi nga adlaw sanglit madalunot an karsada nga posible usa gihapon ha nakag-kawsa han disgrasya.
Samtang, nakabunggu-ay gihapon han bus an katapo hine nga double cab nga nakadi han kaluyo nga linya.
Nag-angkon naman hin mga kasamdan ha lawas ha driver ngan pahenante han bus, ngan usa nga pasaheros nga sakay hine.
Gindara an pahenante ngan pasaheros han bus ha Basey District Hospital ngan an driver naman ha Eastern Visayas Medical Center, kaupod gihapon an driver ngan mga helper han double cab.
