TACLOBAN CITY – Naglalaum an City Business Permit and Licensing Division (BPLD) han Tacloban nga makakahabol an nasasalin nga mga business establishments ha syudad nga waray pa makapagrenew han ira mga business permits san-o an deadline hini yana nga Enero 31.
![](https://img.bomboradyo.com/tacloban/2021/01/BPLD-tacloban-city.jpg)
Una hini, ginveto ni Tacloban City Mayor Alfred Romualdez an City Ordinance no. 2021-14-01 o an ordinansa nga nag-eextend han deadline tubtob unta ha Pebrero 27 para han renewal han business permit sugadman pamayad han mga fees ngan charges.
Sumala kan Gemafiel Gaspay, head han City Business Permits and Licensing Division, ginpapamulat pa nira an opisyal nga ordinansa bahin han pagveto ni Mayor Romualdez ha unta extension han deadline han renewal of permits.
Matungod hini, extended naman operasyon han BPLD yana nga weekend o Sabado-Dominggo agud nga maakomodar an mga mahabol pagrenew han ira mga business permits.
Ha pagkayana in dire na gud sugad kadamo an ginpapamulat han BPLD tungod nga maabot na ha 80-90% an ihap han dokumento han mga business establishments nga ira naproseso.