TACLOBAN CITY- Ginpahibaro han pamunuan han Borongan City Eastern Samar nga nagpapadayon an ira vaccination program pinaagi han ira gindudumara nga drive thru vaccination han mga Boronganon ha mao nga lugar.
Sumala kan Mayor Jose Ivan Agda han Borongan City Eastern Samar, nga dako nga bulig ha ira an pagkakamayda hin drive thru nga vacination ha ira lugar, matungod nga dire la ha kadagmit han pan destribwir han bakuna kundi kalakip gihapon nga nabubuligan hine an paglikay ha hulga han pagkatapon-tapon han COVID-19 ha mga karuyag magpabakuna.
Dugang pa han alkalde nga madagmit nga maubos an ira mga COVID-19 vaccine matungod nga hustle free mangud para ha mga boronganon an pagpapaturok han bakuna tungod nga aada la an mga ine ha ira mga sarakyan.
Ginmalatumat naman han mao nga opisyal nga mas maupay kun damo nga bakuna an maihahatag ha ira syudad agud nga mas damo gihapon an mabakunahan na han COVID-19 vaccine.
Dire mangud maililirong han kada Munisipyo ngan syudad ha rehiyon nga padayon nga nagtitikahitaas an ihap han mga nagpopositibo ha mao nga sakit sanglit nga mas maupay nga ha sayo nga panahon in matagan na an mga katawhan hin bakuna pangontra ha hulga han COVID-19.
