TACLOBAN CITY – Gin eksplikar ni Leyte 1st District Board Member Wilson Uy an rason han pagkakaiba-iba han presyo han produkto nga lana ha yana nga sitwasyon.
Sumala kan Uy, kun mapapansin an sitwasyon yana, mas barato pa an presyo han mga Big 3 nga kumpanya kumpara han mga independent retailers mahitungod nga aadto hira naangkat han ira suplay ha mga dagko nga kumpanya.
Iginpananglitan hini an iya kalugaringon nga gasolinahan kun diin aadto pa hiya naangkat han iya suplay han lana ha Babatngon, ngan an tag-iya han iya gin aangkatan nga gasolinahan in usa han Big 3, kun diin an basaranan han pag-presyo ha ira in an presente nga world market price, nga nagigin rason agud mag-iba iba an ira presyo han lana haros kada adlaw.
Dugang pa hini, dire hira natatagan hin presyo nga pan-retail mahitungod nga dire man hira ada ha ilarom han mga dagko nga kumpanya, sanglit wholesale price la an ginhahatag haira.
Ha kaparehas hini nga panahon, waray gihapon kasiguraduhan an ira suplay mahitungod nga gin uuna anay han Big 3 paghatagi hin suplay an ira mga kalugaringon gasolinahan ugsa an mga independent retailers.
Depensa pa hini, ha syahan pala nga adlaw han kasamok ha Middle East in P80 na dayun an baligya ha ira han dagko nga kumpanya sanglit gin kinahanglan gihapon nira nga mag-adjust ha ira presyo agud dire gihapon hira malugi.
