TACLOBAN CITY– Naghatag hin baton an Bureau of Internal Revenue (BIR) Region 8, ha nagsarang mga reklamo kasumpay ha padayon nga na-aabat nga kahilaba hiton pila han mga tax payers, magin adton mga walk-in, nga may aasikasuhon ha nasabi nga buhatan.
Sumala kan Revenue District No. 88, Officer-Tacloban City, Rizalina Estrada, usa ha mga rason nga nakaka-eksperyensya hiton kahilaba han pila, matungod nga kulang hira hin mga tinaglawas nga nag-aakomodar ha mga tax payers nga nakapadto ha ira opisina, ngan usa gihapon nga rason in matungod nga an mga tax payers nga napakadto in madugay na nga due-date han iya pagbayad.
Nanawagan naman an nasabi nga opisyal, para hadton magdudumara hin transakyon ha ira buhatan, nga bisitahon anay an ira website ngan panginanuon an mga resiketos nga ginkikinahanglan agud nga dire na an mga ine magbinalik-balik.
Ginpaangbit pa hine, nga para hadton nakikirian naman nga mag online visit ha ira website pwede an mga ine personal nga bumisita ha ira buhatan.
Nag-aaro naman ine hin pag-intindi ha publiko, partikular na ira system matungod nga duro kaluya iton connectivity, ngan nagkikinahanglan pa hira nga makigsumpay ha ira revenue data center ngan nagdudugay ine ngada hiton 3 ka-adlaw ugsa nga mahibalik an normal nga dalagan han connectivity.
Nagpatapod naman ine nga ha pagkayana, padayon hira nga naniningkamot nga makaghatag hin maupay nga serbisyo ha publiko.
