TACLOBAN CITY– Nagpalusad hin bag-o nga Red Tide Advisory an buhatan hiton Bureau of Fisheries and Aquatic Resources BFAR Eastern Visayas.
Sumala kan Cristine Gresola,Information Officer han BFAR Eastern Visayas, ha mao nga advisory may nahidugang nga duha nga kabaybayunan ngan an mga ine asya an Carigara Bay (Babatngon, San Miguel, Barugo, Carigara, ngan Capoocan, Leyte) ngan an Matarinao Bay (General MacArthur, Quinapondan, Hernani, ngan Salcedo).
An nasabi nga kadagatan in postibo ha Pyrodinimum bahamense, usa nga nakakahilo nga microorganism nga nagdudurot hin Paralytic Shellfish Poisoning (PSP) ha tubig dagat.
Samtang, nagpapa bilin la gihapon nga ada ha Red Tide warning an kadagatan hiton;
- Coastal Waters of Biliran Islands
- Villareal Bay, Villareal, Samar
- Daram Island, Samar
- Zumaraga Island , Samar
- Maqueda Bay, Samar (Jiabong, Motiong, Paranas, San Sebastian, Calbiga, Pinabacdao, Hinabangan)
- Cambatutay Bay, Tarangnan, Samar
- Irong-Irong Bay, Catbalogan City
- Coastal Waters of Calbayog, Samar
Dugang pa han mao nga opisyal, igindidire la anay an pagkuha, pagkaon, ngan pagbaligya han ngatanan nga klase hiton pangti-on o shellfish ha nasabi nga kadagatan.
Ginklaro naman hine nga an isda, pasayan, nu-os ngan masag in pwede nga kaunon, tikang ha mao nga kadagatan kinahanglan la nga limpyuhan hiton maupay tangalan hiton hasang ngan hugasan gamit an running water ugsa nga lutu-on.
