PALO, LEYTE – Maabot hin 1.2 ka-tonelada hin basura kada semana an nare- recycle han usa nga barangay ha Leyte kon diin kwarta ngan bugas an matatagamtanan han mga residente.
Ini pinaagi han proyekto nga “Kwarta sa Basura” ngan “Bugas sa Basura” program han Barangay Luntad, Palo, Leyte.
Sumala kan Kapitan Ian Andres Sevilla, duha na katuig an naglabay han gintikangan nira an pag implementar han Ecological Solid Waste Management ha ira barangay nga panuyo nga maibanan hin kutob 25 porsyento an mga ginhahapil nga basura.
Una nga gin-implementar an programa nga “Kwarta sa Basura” kon diin ginpapalit han barangay tikang ha mga residente an mga recyclable garbage sugad hiton plastics, puthaw, karton ngan iba nga pa.
Gintatagan liwat hin Garbage Bank Card han barangay an nagpatong ngan ginlilista kon pira ini kakilo.
Igbabaligya liwat han barangay an mga natirok nga mga recyclable materials ha usa nga junk shop kon diin mayda hira memorandum of agreement ngan an kwarta nga natitirok dinhe in ginbabayad ha nagbaligya nga residente.
An ganansya liwat han barangay in ginpapalit hin bugas para ha “Bugas sa Basura” program kon diin ginbabalyo hin tunga hin kilo nga bugas an kada usa ka 1.5 nga botelya hin gingunting-gunting nga residual waste sugad nala hiton cellophanes, plastic wrappers, putos hin sabon ngan shampoo ngan damo pa nga iba.
Ini nga gingunting-gunting nga basura ha sulod hit botelya in ginhihimo nga eco chair ngan ginbabaligya liwat hiton barangay.
An matitirok nga kwarta dinhe in igpapalit hin plastic shredder.
“Dapat tagan hin value han mga tawo an basura ngan para maaghat pa hira nga tirikon an ira basura ngan diri ilabog bisan la diin nga usa ha nagiging kawsa han polusyon nga baha”, pamahayag ni Kap. Sevilla ha interview han Bombo Radyo.
Ha pagkayana in nakikipagsumpayan na liwat hi Sevilla ha Palo National High School para ha plano han eskwelahan nga “school supply sa basura” kon diin titirukon han mga estudyante an ira mga basura para igbalyu hin gamit ha eskwelahan.
Hingyap liwat hini nga subaron han iba pa nga LGUs an ira pitad para ha malimpyo nga kalibungan.
