Ginkilala hi Barugo, Leyte Mayor Dr. Aron Balais kumo Outstanding Mayor of the Year 2026 han Philippine Choice Award, nga para ha iya usa nga dako nga dungog diri la ha iya kalugaringon kundi para gihapon ha bungto han Barugo.
Ginpahayag ni Balais nga sobra hiya ka-swerte ngan mapasalamaton nga napili kumo national awardee, labi na nga sobra 300 nga mga nominado an ginsara ngan gin-imbitar para ha panel interview. Iya ginklaro nga waray hiya paglaum nga makakarawat han award, ngan para ha iya, dako na nga kalipay nga nakasulod hiya ha mga finalist han panel interview.
Sumala ha iya, duha tubtob tulo ka adlaw an naglabay han iya pakakarawat hin mensahe nga hiya an napili nga Outstanding Mayor of the Year ha bug-os nga nasud para han tuig 2026. Ginpahayag niya nga diri niya ini ginlalauman, sanglit mas dako an iya pagpasalamat ha pagkilala nga ginhatag ha iya ngan ha bungto han Barugo.
Lakip ha ginkonsiderar han award-giving body amo an good governance ngan innovations, mga programa ngan proyekto para ha social support, ngan an performance ni Balais ha iya siyahan nga termino kumo mayor. Ginkita liwat han panel an mga rekord han munisipyo ngan nagdumara hin background investigation antes himoon an pinal nga pagpili han awardee.
Ginpabug-atan ni Balais nga usa nga posible dako nga nakabulig ha pagkilala amo an padayon nga pagmintinar han Barugo ha Seal of Good Local Governance, sugad man an iya aktibo nga pakigkooperar ha mga grupo ngan organisasyon nga nagtutuyo ha pagpadig-on han good governance ha mga lokal nga panggamhanan. Para ha iya, an award usa nga pagkilala ha mga paningkamot han lokal nga panggamhanan nga maghatag hin maupay nga serbisyo ha mga Barugonon.
