TACLOBAN CITY – Nakatalaan nga pagdumaraon yana nga tiarabot nga Hunyo 25 ngan 26 an Banka Rumba 2026 kumo kaparte han aktibidad han kapatrunan han sydudad han Tacloban.
An Banka Rumba in mayda tulo nga katergorya: reggata (de-layag), bankarera (de-motor), ngan paddle race (de-bugsay).
Sumala kan Tacloban Fishery Law Enforcement Team (FLET) Chief Operations-In-Charge, Mark Nerja, kada kategorya in kinahanglan hin 20 nga partisipante kun diin ha hapagkayana in gutiay nala nga slot an nasasalin nga mapupuno na an mga ini.
Para han regatta, tulo nga slot nala an nasasalin, an bankarera tulo nala gihapon, ngan an paddle race naman in duha nala nga slot an abri.
Ginpahibaro naman hi Nerja nga abri para ha ngatanan nga kwalipikado nga paru-pangisda an reggata ngan bankarera, samtang an paddle race in ekslusibo la para ha mga residente han Tacloban.
Para naman han pa-premyo, an magka-kampeon han paddle race ngan regatta, in makakakuha hin P20,000, an 1st Placer mayda P15,000; 2nd placer makakuha hin P10,000; an 3rd placer in mayda P8,000, ngan makakakarawat naman hin P1,000 nga consolation prize an mga dire papalaron nga magdaog.
Samtang, mas dako naman an papremyo han bankarera kun diin makakakarawat hin P25,000 an magka-kampeon; P20,000 naman para ha 1st place; P15,000 para han 2nd placer; P10,000 para han 3rd placer, ngan tag-P1,00 naman nga consolation prize para han dire magdadaog.
Ginpasabot gihapot han opisyal nga libre o waray bayad an pagpa-rehistro ha nasabi nga paisan-isan pero kinahanglan magpasa han mga gin-aaro nga rekisitos, amu an Barangay Clearance, Cedula, photocopy hin Valid ID, ngan 2×2 nga ID picture.
