TACLOBAN CITY – Gintatalinguha ni House minority leader ngan 4Ps party-list Rep. Marcelino “Nonoy” Libanan nga mahimo nga balaud an House Bill 3647 nga magtutunga ha Eastern Samar kumo duha nga legislative districts.
Ha pag-atubang ni Libanan ha media kakulop, Abril 11, ginpahayag hini nga nakab-ot na han probinsiya an kinahanglan nga resikitos agud mahimo ini nga duha ka-distrito.
Kumpyansa naman ini susuportahan han mga senador an balaudnon ha oras nga umabot na ini ha senado.
Gintagan hin duon ni Libanan nga kinahanglan hin mas makusog nga representasyon an Eastern Samar ha kongreso para hin mas damo pa nga mga serbisyo iton mapahimulusan han mga constituents.
” Usa ini ha akon priority nga matunga hin duha ka-distrito iton Eastern Samar tungod kadako hin duro ini nga advantage ha mga kinahanglanon nga social ngan infrastructure development funding”, pahayag hini.
Ha sulod han House Bill 3647, iton first legislative district in kakalakipan han Borongan City ngan hiton 10 nga bungto han Arteche, Can-avid, Dolores, Jipapad, Maslog, Oras, San Julian, San Policarpio, Sulat nganTaft.
Bubug-uson liwat iton second legislative district hin 12 nga bungto hiton Balangiga, Balangkayan, Gen. MacArthur, Giporlos, Guiuan, Hernani, Lawaan, Llorente, Maydolong, Mercedes, Quinapondan ngan Salcedo.
