ODD NEWS- Usa nga 40-anyos nga babaye tikang ha Northern Ireland an nakailob hin 17 kaadlaw nga mayda nakabara nga putos hin medisina ha iya lalamunan mahuman matulon ini kaupod an gin-iinom nga medisina.
Sumala hiton babaye, gab-i ngan masirom na ha iya kwarto han imnon niya an pain killer medicine nha ginreseta han doktor. Mahitungod hiton kapirawan, waray niya mahisabti nga an putos han medisina in natulon niya.
Nagmata hiya nala hiya han aga nga mayda nakabara ha iya lalamunan. Han igpakita niya ha EENT doctor, waray naman nakit-an nga kakaiba han magpailarom hiya ha x-ray. Ginpabalik na la hiya han doctor kun mayda man hiya abaton nga kakaiba.
Ha sakob hiton duha kasemana, nagpabalik-balik an babaye ha ospital, matungod mayda ini gin-aabat nga kakaiba ha iya lalamunan pero kun igpapa-xray hiya, normal an magawas ha resulta sanglit permi la hiya ginpapauli.
Han igpakita na hiya ha iba nga ospital ngan nagpailarom ha oesophagogastroduodenoscopy (OGD) scan, nakit-an an putos han medisina ha iya Upper oesophagus.
Manilampuson nga natanggal an putos ha iya lalamunan ngan dayon gihapon nakauli mahuman hiya maobserbahan nga waray nahimo nga distroso an putos ha iya lawas.
