TOLOSA, LEYTE – Waray la anay maihatag an anniversary bonus han mga empleyado han Don Orestes Romualdez Electric Cooperative (DORELCO) mahitungod han pan-impati han kantidad nga nakabutang ha dokumento.
Sumala kan DORELCO General Manager, Chris Garcia, nag-iimpati an kantidad nga nakabutang ha ira collective bargaining agreement ngan ha dokumento nga gin-aaprubahan han National Electrification Administration.
Dugang pa hini, ginpapasa anay ha NEA an ngatanan nga mga benepisyo nga makakarawat han mga empleyado agud aprubahan, kun diin dire la ini ha DORELCO kundi ha ngatanan nga electric cooperative nga sakop han NEA ha bug-os nga Pilipinas.
Nadepende gihapon ha NEA kun aaprubahan hini an mga benepisyo nga makakarawat han mga empleyado.
Ha lain nga bahin, ugsa maaprubahan an mga benepisyo nga natatagamtaman han mga empleyado in may-ada mga parameters nga ginbabasehan an NEA kun nahipasa ba ini o waray.
Ha pagkayana, nakigsumpayan na an management han union ha National Conciliation and Mediation Board nga igpasa balik an nasabi nga benepisyo ha NEA para han pagrekonsidera ngan kaangayan nga aksyon.
