Nagdig-on hi anay Sen. Francis Tolentino nga mayda klaro nga coordinates ha West Philippine Sea (WPS), subay ha gintudlok han Republic Act No. 12064, o Philippine Maritime Zones Act.
Ine in tarihas ha claims ni Sen. Rodante Marcoleta nga hasta yana in waray ‘specific computation o coordinates’ han West Philippine Sea.
Pag-eksplikar ni Tolentino, an coordinates nga nakasulod ha Philippine Maritime Zones Act, in nai-deposito, ginkarawat, ngan ginkikilala na han Secretary-General han United Nations, ngan an mga ine na an magseserbi nga official maritime reference han Pilipinas.
Kun mayda man daw magyayakan nga waray klaro nga mapa ngan coordinates ha WPS, ine in usa nga panguwat ngan usa nga klase hin disinformation.
Hi Tolentino an nagin principal sponsor han Republic Act No. 12064, an balaod nga natudlok ha territorial sea, contiguous zone, exclusive economic zone (EEZ), ngan continental shelf han Pilipinas.
Nagin sentro han mapaso nga debate nira Sen. Rodante Marcoleta ngan Sen. Kiko Pangilinan an nasabi nga isyu ha kakusgan han paghingaday ha panukala nga Senate Resolution No. 256, an resolusyon nga makondena ha mga kontrobersyal nga pahayag han Chinese Embassy ha Manila kasumpay ha isyu han gin aagawan nga kadagatan.
