TACLOBAN CITY – Mapasinalamaton an usa nga market vendor ha nagin pagtapod ngan suporta han katawhan ha iya mahuman magdaog kumo bag-o nga alkade han Dolores, Eastern Samar han nakalabay nga piniliay.
Sumala kan newly elected Mayor Rodrigo Onoy Rivera han Dolores, waray hiya makinaraya nga gingamit ngan an gutiay nga donasyon nga iya nakuha tikang ha magkalain-lain nga ahensya la an iya gingamit pagdalagan ha mao nga pwesto
Pinaagi han han pakighimangraw hine ha katawhan hin kinasing-kasing ha iya pangampanya in nakuha niya an suporta han kadam-an kun diin hiya an ginpili nga magin bag-o nga lider han nasabi nga bungto.
Dugang pa hine nga an nagduso ha iya pagdalagan pagka Mayor in agud nga igpakita ngan igpa-experyensya ha mga Doloresnon an tinuod nga paghigugma para ha mao nga lugar.
San-o nga dumalagan pagka-alkalde in nagserbe anay hin siyam katuig hi Rivera kumo barangay kapitan.
Mababaruan nga usa ha iya plata-porma in tutukan an sektor hiton agrikultura han ira bungto, paghihimo hin kadugangan nga irigasyon, libre nga fertilizer, pagdudugang hin mga ospital, ekwelahan ngan sugadman paghahatag hin libre nga pag tambal ha mga may sakit.
Ginpatapod naman hine nga makakalaom an mga taga-Dolores nga magseserbisyo hiya hin tangkod para ha ira mga molopyo kumo bag-o nga alkade han Dolores, Eastern Samar.
