TACLOBAN CITY – Dayon nga naaresto han mga kapulisan an suspek ha pagpusil-patay ha anay bise alkalde han Calbiga, Samar samtang nagmamaneho ini han iya bisekleta ha parte han Maharlika Highway han mao nga bungto.
Ginkilala an biktima nga hi Miguel Abaigar, 54 anyos, ngan residente han Brgy. Canticum, Calbiga, Samar samtang ginkilala naman an suspek nga hi Allan Malagueno, 43 anyos, dati nga AFP member nga gin-aalegar nag-AWOL, ngan residente han Sitio Igot, Brgy. Maulong, Catbalogan City ha Samar.
Sumala kan Pol. Col. Peter Yu Limbauan, Provincial Director han Samar Police Provincial Office, mahuman an panmumusil in dayon nga tumakas an suspek pero naaresto naman ini ha checkpoint sakay ha usa nga single nga motor ha parte han Brgy. Bato, Paranas, Samar mahuman nga ig-alerto han Calbiga PNP an mga katharani nga police stations.
Ha pagkayana in padayon pa an ginbubuhat nga imbestigasyon han mga kapulisan agud nga matudlok an motibo han mao nga panmumusil.
