Gintudlok han Anti-Money Laundering Council o AMLC an mga krimen may paghisumpay ha dire pagbabayad hin sakto nga buwis kumo usa ha pinakadako nga hulga han money laundering ha Pilipinas.
Subay ha Third National Anti-Money Laundering and Counter-Terrorism Financing Risk Assessment, ginbabana-bana nga umabot ha P500 bilyon kada tuig an nawawara nga kita han gobyerno mahitungod ha tax evasion.
Ginmalatumat han AMLC nga an salapi nga nagtitikang ha dire pagbabayad hin buwis in pwede igpuslit ha legal nga sistem pinaagi han mga shell company, peke nga transakyon, sayop nga invoices, real estate, luxury goods, ngan iba pa nga negosyo agud maitago an tinuod nga tinikangan han pondo. Mas nagigin makuri gihapon an pagtudlok ha mga transakyon kun ini in nagamit han mga offshore account ngan komplikado nga corporate structures.
Labot ha tax crimes, gintudlok gihapon han report an illegal drug trafficking, panguwat o estafa, cyber-enabled scams, ngan environmental crimes kumo mga pangunahon nga gintitikangan han money laundering ha nasud. Tikang han 2021 kutob 2024, nakaghipatik an mga otoridad hin ginatos-gatos nga kaduda-duda nga transakyon may paghisumpay ha mga nasabi nga krimen.
Bisan man kun ginmalatumat han AMLC nga ginpakusog na han Pilipinas an mga balaod, koordinasyon han mga ahensya, ngan kapas ha pagbantay kontra ha money laundering, iginduon hini nga kinahanglan pa hin padayon nga reporma agud mapuypoy an pondo nga nagtitikang ha ilegal nga buruhaton.
