TACLOBAN CITY – Dida han mga nakalabay nga bulan in gin-anunsyo han EDCOMM 2 an usa ha mga nagin problema han Department of Education pag abot ha hibaro han mga istudyante, nagawas nga damo nga lugar ha nasud Pilipinas an may problema pag-abot ha pagbasa ngan reading comprehension.
Mahitungod hini, ginkabaraka han pira nga mga senador tungod nga dako an epekto hini ha mga istudyante labi na an mga nagradwar nga hamubo iton literacy rate kun diin, makakaapekto ini ha oras han ira panarabahuan.
Kaupod an Sinirangan Bisayas ha mga lugar ha nasud nga naobserbaran nga hamubo an reading comprehension, nga kun diin usa ha mga solusyon han DepEd Regional Office 8 in an mahugot nga pagpatuman han Alternative Learning System ngan pag-hire hin mga magturutdo,
Gintagan hin pokus han mao nga programa an out of school youths, may disabilities, ngan mga PDLs ngan former rebels ngan iba nga waray kapas nga maka-eskwela.
Sumala kan Department of Education 8 Regional Director, Salustiano T. Jimenez, dako an naibulig han ALS ngan han mga ALS teachers mahitungod nga napahitaas an porsyento han literacy rate han rehiyon.
Maabot mangud ha 623 nga mga magturutdo ha Sinirangan Bisayas nga nagtu-tutor ngan gindeploy ha mga tay-aw nga lugar ha rehiyon.
Samtang, mahitungod naman han programa, natagan hin insakto nga hibaro ngan oportunidad an mga istudyante.
