SAN MIGUEL–Gintagan hin klaro han alkalde han San Miguel Leyte, Atty. Norman Sabdao, an isyu kasumpay han ira usa nga government vehicle nga ginaalegar nga gingamit ha pribado nga negosyo nga nagsarang ha social media.
Sumala han alkalde, ginpa-ayad an nasabi nga sarakyan nga ginkuha han authorized driver nga naka-assign ha mao nga municipal van agud nga ig test-drive ngan igdara ha munisipyo.
Samtang, han pag-test drive hine, umuli anay an driver hine agud nga kumaon kun diin ginparada niya an sarakyan ha ligid han usa nga pribado nga tuna agud nga malikayan an aksidente.
Samtang nakaon ine, didi napicturan an nasabi nga sarakyan ngan ginpasa ha usa nga social media page nga hinungdan han pagsarang han isyu.
Nanawagan naman an alkalde hin responsible journalism ha nasabi nga page ngan dire unta igpasarang an impormasyon kun dire pa beripikado an kamatuoran hine.
Ginpahayag naman ni Sabdao nga die niya papabay-an kun mayada sugad nga mahitabo, ngan ginduon nga consistent an mao nga bungto nga national awardee ha good governance.
