TACLOBAN CITY – Plantsado na an aktibidad para han komemorasyon han ika-11 nga anibersaryo han Super Typhoon Yolanda nga pagdudumaraon ha siyudad han Tacloban.
Sumala kan Tacloban City Tourism Operations Officer-In-Charge Ma. Lumen Tabao, nga maabot hin haros duha ka-adlaw an nasabi nga komemorasyon kun diin pagtitikangon yana nga adlaw, Nobyembre 7 an usa nga misa nga pagdudumaraon naman ha Anibong Shipwreck banda alas 4:30 hiton kulop.
Pag-abot naman hiton Biyernes, Nobyembre 8, in magkakamayda hin misa ha Mass Grave, Holy Cross Memorial Garden banda alas 8:00 hiton aga ngan ha kaparehas gihapon nga oras in magkakamayda naman hin barangayan ha St. Francis Village, Brgy. 105 Suhi.
Magkakamayda hin Wreath Laying ha alas 4:30 hiton kulop ngan an tinuig nga citywide candle lighting banda alas 5:00 hiton kulop.
Mahuhuman an mao nga aktibidad banda alas 6:00 hiton gab-i kun diin, pagbubuhaton naman hini nga oras an candle lighting ceremony ha Plaza Rizal.
Dugang naman ni Tabao nga mayda gihapon mga bisita nga mangangabot ha adlaw hiton Biyernes ngan makikiurusa ha pagdumdum han mga biktima han Super Typhoon Yolanda.
Samtang, temporaryo naman nga pagsasadhan yana nga adlaw an Anibong Road pagtikang hiton alas 10:00 han aga kutob alas 7:00 hiton gab-i kumo kaparte han pangandaman ha pagbubuhaton nga misa ha Anibong Shipwreck Memorial.
