TACLOBAN CITY – Mas damo an ihap han mga motorsiklo nga nadadabi ha disgrasya ha kadalanan kumpara ha iba nga klase han sarakyan, ini in sumala kan Department of Health Eastern Visayas Information Officer, Ken Fabula.
Dugang pa hini, mas ginpipili manggud han mga katawhan motorsiklo kumo paagi han transportasyon mahitungod nga labot la ha pagigin accessible hini, in mas tipid gihapon ini gamiton kumpara ha mga four-wheels nga sarakyan labi na yana nga hitaas an presyo han mga produkto nga lana.
Samtang, gin pasabot hini ha publiko nga waray suspensyon ha operasyon an mga hospitals ha bug-os nga nasud yana nga Semana Santa.
Magpapabilin gihapon an pagpatuman han Zero-Balance Billing Program ngan Yakap program ha mga mga hospital yana nga Holy Week.
Andam naman an mga hospital ha rehiyon, magin an mga DOH-retained hospitals, nga kumarawat hin pasyente ha butnga hiton Semana Santa.
Nagpahinumdom gihapon ini ha publiko nga limitahan an 4Ms—mag-parat, mamantika, magtam-is, ngan mag-tambok nga pagkaon. Uminom hin walo ngada ha napulo kabaso hin tubig kada-adlaw agud malikayan an dehydration o pagmamara, ngan magpakonsulta kun mayda na mga gin aabat nga sakit sugad hiton ubo ngan sip-on ngan magsul-ot hin facemask agud dire makapanapon.
