TACLOBAN CITY– Nagdudumara hin joint security operations an Arm Forces of the Philippines kasugbong an Tacloban City Police nga tinawag nga “Joint Enhance Military and Police Law Enforcement Operations (JEMPLEO) agud masigurado an kamurayaw ngan seguridad han katawhan labi na an mga batan-on.
Sumala kan Philippine Army 8th Infantry Division Public Affairs Officer Capt. Christopher Tataro, an pagkakamay-ada hin mga checkpoints in kaparte han nahitabo nga shooting incident ha San Jose National High School.
Ginpasarang an pwersa han kapulisan ngan kasundaluhan ha parte han Imelda Village, Brgy. 88 Marasbaras, Brgy. 91, Diitt, Brgy. 101 New Cawayan ngan parte han San Juanico Bridge.
Ha pagkayana, waray pa pwersa han kasundaluhan ha mga eskwelehan ha Tacloban pero kun maghangyo an PNP o direkta makigsumpayan an eskwelahan haira, in dayun hira magbubutang han ira mga tropa.
Nagpa-angbit naman hin pagpasalamat hi Capt. Tataro ha mga Tacloban han ira pag-intindi ngan nagpahimatngon nga mahatag hin suporta ngan koordinasyon ha Tacloban City Police Office ngan City Government of Tacloban para masiguro an kamurayawan ngan seguridad.
